വരന്തരപ്പിള്ളിയിൽ കനകദുർഗക്ക് നേരെ ബിജെപി പ്രതിഷേധം, പോലീസ് ലാത്തിവീശി

വരന്തരപ്പിള്ളി നന്തിപുലത്തെത്തിയ കനകദുർഗക്ക് നേരെ ബിജെപി പ്രവർത്തകരുടെ പ്രതിഷേധം. പ്രവർത്തകർക്ക് നേരെ പോലീസ് ലാത്തിവീശി. പഞ്ചായത്തംഗം ഉൾപ്പടെ 9 ബിജെപി പ്രവർത്തകരെ അറസ്റ്റ് ചെയ്തുനീക്കി. സംഘർഷത്തിൽ വരന്തരപ്പിള്ളി എസ്എച്ച്ഒ എസ്.ജയകൃഷ്ണനും ബിജെപി ജില്ലാ കമ്മിറ്റിയംഗം സജീവൻ അമ്പാടത്തിനും ഒരു പ്രവർത്തകനും ലാത്തിചാർജിൽ പരിക്കേറ്റു. ഞായറാഴ്ച ഉച്ചയോടെയായിരുന്നു സംഭവം. നന്തിപുലം സഹകരണ ബാങ്ക് ഹാളിൽ നടന്ന എഴുത്തുപുര വാട്സാപ്പ് കൂട്ടായ്മയുടെ മൂന്നാം വാർഷികത്തിൽ പങ്കെടുക്കാനെത്തിയതായിരുന്നു  കനകദുർഗ. നന്തിപുലത്തിന് 200 മീറ്റർ അകലെ രണ്ട് പോലീസുകാരുടെ കൂടെ സ്വകാര്യ ബസിൽ വന്നിറങ്ങിയ കനകദുർഗയെ കൂടുതൽ  സുരക്ഷയിൽ പോലീസ് ജീപ്പിലാണ് സ്ഥലത്തെത്തിച്ചത്. ഇതിനിടെ കനകദുർഗ സ്ഥലത്തെത്തിയറിഞ്ഞ് പ്രവർത്തകർ ബാങ്ക് ഹാളിന് ചുറ്റും തടിച്ചുകൂടുകയായിരുന്നു. സംഘർഷ സാധ്യത കണക്കിലെടുത്ത് ചാലക്കുടി ഡിവൈഎസ്പി ലാൽജിയുടെ നേതൃത്വത്തിലുള്ള പോലീസ് സംഘം സ്ഥലത്തെത്തിയിരുന്നു. പ്രവർത്തകരോട് പിരിഞ്ഞ് പോകാൻ പോലീസ് നിർദ്ദേശിച്ചെങ്കിലും പ്രവർത്തകർ അനുസരിച്ചില്ല. കനകദുർഗയെ ഇവിടെ നിന്ന് പറഞ്ഞയക്കണമെന്നാവശ്യപ്പെട്ട് പ്രവർത്തകർ മുദ്രാവാക്യം വിളിച്ച് പ്രതിഷേധം ശക്തമാക്കി. പോലീസ് ലാത്തിവീശിയാണ് ബാങ്ക് പരിസരത്തും റോഡിലും തടിച്ചുകൂടിയ പ്രവർത്തകരെ ഓടിപ്പിച്ചത്. ലാത്തിചാർജിനിടെ പരിക്കേറ്റ എസ്എച്ച്ഒ ജയകൃഷ്ണനും സജീവൻ അമ്പാടത്തും പുതുക്കാട് താലൂക്ക് ആശുപത്രിയിൽ പ്രാഥമിക ചികിത്സതേടി. പഞ്ചായത്തംഗം അരുൺ മാഞ്ഞൂർ ഉൾപ്പടെ 9 പേരെയാണ് പോലീസ് അറസ്റ്റ് ചെയ്തത്. സ്ഥലത്ത് നിന്ന്  പ്രവർത്തകരെ പൂർണമായും നീക്കിയശേഷം പോലീസ് ജീപ്പിലാണ് കനകദുർഗയെ നന്തിപുലത്തുനിന്ന് മാറ്റിയത്. സംഘർഷസാധ്യത കണക്കിലെടുത്ത് പ്രദേശത്ത് കൂടുതൽ പോലീസിനെ വിന്യസിച്ചു.

X

സർക്കിൾ തൃശ്ശൂർ
നമ്മുടെ നാടിന്റെ സ്വന്തം ആപ്പ്

ചാലക്കുടി, കൊടുങ്ങല്ലൂർ, ചാവക്കാട്... അങ്ങനെ എല്ലായിടങ്ങളിലും 👉

തൃശ്ശൂർ ജില്ലയിലെ 7000 പേരോളം സർക്കിളിൽ! താങ്കളും ചേരൂ 👉

Install
App